Wednesday, July 27, 2011

Tómatar

Mér var sagt að það ætti að klippa tómatplönturnar þannig að öll neðstu blöðin væru fjarlægð og einnig blöð þar sem ekki væru að myndast tómatar.  Það á víst líka að fjarlægja alla sprota sem vaxa útfrá "öxlunum".  Ég klippti því tómataplönturnar mínar í kvöld.


Uppskera

23 júlí voru fyrstu kartöflurnar teknar upp.  Þær voru af gerðinni Premier.  Einnig var brokkolíið tilbúið.  Hvoru tveggja gómsætt auðvitað.
Í dag grisjaði ég gulræturnar og rauðrófurnar sem ég sáði fyrir.
Jarðaberin eru að þroskast og þegar við sáum að rauðu berin voru hálf étin var breitt yfir beðið en það sást til sökudólgsins hoppa í kring.  Lítill spörfugl.
Rauðrófusalat sumarsins er svona:
Nokkrar litlar rauðrófur, jafn mikið af gulrótum.  Einnig hnúðkál radísur eða zucchini ásamt einu epli.  Allt rifið í skál og sítróna kreist yfir.  Þá er ca 2 skallottulaukar skornir fínt og settir í.  Að lokum er majonesi og sýrðum rjóma eða skyri hrært saman við um eina tsk dijon sinnepi og dressingin sett á salatið.
Svartyllirinn er útsprunginn og eru greinarnar svo þungar af blómaklösunum að þær leggjast að jörðu.  Búið er að gera saft úr 30 blómum en nóg er eftir.



sykurbaunirnar eru byrjaðar að klifra eftir vírunum 

sykurbaunir

svartræturnar vaxa hægt

laukur

fennel

rauðrófurnar grisjaðar

blómaklasi af svartyllinum.  Tilbúinn til að hægt sé að gera saft úr honum

Svartyllirinn þakinn blómum


brokkolí

fyrstu kartöflur sumarsins

Friday, July 22, 2011

Ávaxtaræktun á Hellu

Við vinkonurnar vorum svo heppnar að fá að fara í heimsókn til Sæmundar Guðmundssonar eplabónda á Hellu.  Þar ræktar hann í heimilisgarðinum ekki bara epli heldur allra handa ávexti og ber og er garðurinn ævintýri líkastur.  Hann er líka sérlega fróður og finnst gaman að segja frá. Ekki nóg með það heldur fór ég heim með 2 plómugræðlinga, held að yrkið heiti Edda og sé norskt.  Einnig fékk ég stikilsber og havaírós sem á að geta lifað utandyra.   Ég þakka bara kærlega fyrir mig.  

Súlutré.

hérna sést hvernig hann bindur þau upp


Hann bindur greinarnar á plómutrjánum niður þannig að þær hanga.



Espalier




glæsilegur  eplaklasi




plómutré


Conference í góðu skjóli

Þetta er yrkið af bláberjum sem hann mælir með

hérna sjást bláberin

eplatré í góðu skjóli upp við húsvegginn þakið eplum.  Held þetta sé krónprinsinn







Monday, July 18, 2011

Hnúðkál

Ég kom í Smálönd í dag eftir að hafa verið í burtu í nokkra daga á ferðalagi.  Þar beið mín mikið magn af tilbúnu grænmeti, hnúðkálið er tilbúið, radísurnar orðnar að risum og rauðrófurnar þurfti ég að taka upp líka þar sem þær hafa hlaupið í njóla. Brokkolíið er líka tilbúið og verður tekið upp á morgun.

Baunirnar 

Rauðrófur 

Allt of mikið af Radísum sem voru líka orðnar algerir risar.  Vantar uppskriftir!

Hnúðkál er gómsætt hrátt og eldað

Brokkolí 

Búið að uppskera hnúðkálið

Kartöflubeðið

Fennel

Laukurinn er frekar lítill ennþá en allur að koma til samt

Hnúðkál og rauðrófur ásamt skallottolauk og hvítlauk,, kryddað með  timian, salti  og hvítlauksdufti  bakað í ofni.  Bara gott. 

Sunday, July 10, 2011

Óværa

Í dag sá ég að óboðnir gestir voru sestir að á Sólberjarunnunum mínum.  Efstu blöðin voru krumpuð og innan í þeim voru grænar litlar pöddur ásamt svörtum litlum flugum og einhverjum hvítum flygsum.  Geri ráð fyrir að um sé að ræða blaðlús.  Þá er bara spurning hvað sé til ráða.  Ég vil ekki eitra það er víst.


Hér kemur mynd af Svartyllinum.  Hann er þakinn blómum.  Síðustu ár hefur hann blómstrað tvisvar að sumri og þroskað ber. 

Thursday, July 7, 2011

Tómatar

Tómatplönturnar mínar eru 4 í einum potti.  Þær eru allar farnar að blómstra og nokkrir litlir tómatar að myndast.  Ýmislegt verður þó gert öðruvísi á næsta ári.  Plönturnar verða færri í hverjum potti, ég ætla ekki að umpotta þeim oft, og ég ætla að binda þær strax upp en ekki bíða eftir að þær velti um koll.


ég var að binda þær upp í dag og urðu þær að flytja úr glugga niður á gólf. 

Ekki yndisfríð planta en gæti litið betur út.  Það þarf að vökva tómatplöntuna helst 2 svar á dag.  Ég nota maxicrop áburð af og til.  Kemur vel út.  Ekki hefur komið nein óværa á þá sem betur fer. 

Wednesday, July 6, 2011

Rauðrófna vandræði

Mér sýnist forræktuðu rauðrófurnar sem ég setti niður síðast í maí allar vera að hlaupa í njóla. Það lítur út fyrir að ég hafi sett þær of snemma niður.  Þær eru viðkvæmar og þola kulda illa.  Ég tók því nokkrar upp í dag og fyrir 3 dögum síðan og gerði mér salat í dag.  Það samanstóð af rifnum gulrótum, rauðrófum, epli og rauðkáli ásamt smátt skornum skallottlauki.  Útá þetta fór sítrónusafi, sléttblaða steinselja og majónes með sinnepi.  Mjög gott.  Þær eru semsagt nothæfar þrátt fyrir allt.  Pínulitlar reyndar, álíka og radísurnar. 

Hérna sést hvernig hún er hlaupin í njóla

Farinn að myndast brokkolíhaus

Hnúðkál, nú er bara spurning hvort ég fái að hafa það í friði í ár

Svartræturnar líta ágætlega út.  Þær eru víst mjög hægvaxta

blandað salat, alltaf gott að eiga nóg af því

matlaukurinn er aðeins að koma til. 

Veðrið var mjög gott í dag, hlýtt og sól.  Við höfum þurft að vökva oft í sumar.