Seinkun á vorverkum

Var sein með öll vorverk þetta árið, ekki bara vegna kulda í maí heldur einnig vegna anna.  Ég forræktaði dill, tvenns konar Lavender,  fennel og oregano Keypti svo forræktað brokkolí (gekk illa að forrækta það í fyrra).  Ég sáði fyrir blaðsalati, spínati, rukkola.  Einnig fyrir rauðrófum, baunum, steinselju og meira dilli.  Setti niður 2 konar kartöflur, rauðar og gullauga.  Nú er allt komið niður á sinn stað sem betur fer.  

 Ég var ánægð með að aspasinn virðist hafa lifað af veturinn og glittir nú í nokkra sprota.

Sýnist þetta vera fennel.

Lavender

Af græðlingum og öðru tilfallandi

Dagurinn í dag var fagur, sól og heiðríkja en ansi kalt.  Ég skellti mér samt útí garð og við hjónin settum upp nýjan vír sem mun styðja við næstu hæð á epla "espalier" .  Svo er að klippa toppinn af eplatrjánum rétt fyrir ofan vírin og venja tvær greinar útá við meðfram vírnum.  Smátt og smátt verður til lifandi limgerði úr eplatrjám ef ég fæ mínu framgengt en ekki pöddurnar sem hafa herjað á trén.  Síðasta sumar var það Laufrani.
Undir ljósi í bílskúrnum vaxa og dafna Lavender græðlingar "Ellegance sky". Ég á enn plöntur sem eru nú á öðrum vetri í garðinum mínum.  Þær eru í keri sem stendur við bilskúrinn. Mér sýnist fara að líða að því að það þurfi að prikla græðlingana.  Hin fræin sem ég keypti (Hidcote blue) eru enn ekki farin að spíra.
Ég umpottaði chiliplöntunum síðan í fyrra en ein er aftur farin að blómstra.
Appelsínutréð sem ég sáði fyrir í fyrra er ósköp druslulegt en ég umpottaði því og krossa fingur að það lifi.

Lavender

Chili planta farin að blómsta að nýju

Chiliskógur

Appelsínutré

Vorverkin

Mér finnst veturinn varla hafa látið sjá sig þetta árið.  Allavega ekki enn sem komið er og þetta gerir það að verkum að vorverkin eru hafin hjá mér.  Vetrargosarnir eru komnir upp, alltaf jafn fallegir

Ég fór útí garð og byrjaði að klippa runnana mína.  Sólberin þarfnast ekki mikillar snyrtingar þetta árið en Svartyllirinn minn er svolítið að gera mig gráhærða.  Hann er of stór fyrir litla garðinn minn, vex allur út og suður, leggst niður við jörð og er þar allur í einni flækju.  Hann fékk harða útreið og er ég líka að hugsa um að færa hann til.
Ég er með 2 opna safnhauga í grindum og mokaði úr eldri haugnum sem er nú 2 ára og setti í hornið í garðinum.  Þar fær hann að rotna 1 ár í viðbót.  Þetta leit vel út og stór hluti var orðinn fallega svartur og lyktin þægileg rotnunarlykt.

Ég sáði fyrir tveim tegundum af Lavender, bæði Ellegance Sky sem ég hef áður sáð fyrir og lifir hjá mér í keri sem stendur uppvið húsvegg.  Svo sáði ég fyrir Hidcote Blue strain.  Það á að vera harðgerður runni sem blómstrar á öðru ári.

Ég mældi eplatrén mín og merkti þau með koparmerkimiða

Huvitus hafði vaxið 67 cm
Safstaholm 74 cm
Pirja 81 cm en hún brotnaði illilega sl vetur.

Basilikan er farin að skjóta upp kollinum.  Hún er inni í eldhúsi hjá mér, ég er farin að hlakka til að fá mér tómatasalat með mozzarella og basiliku.

Undirbúningur fyrir vorið

Nú er hafinn undirbúningur fyrir vorið og sumarið.  Ég velti fyrir mér hvaða tegundir mig langar að rækta og er búin að sá fyrir basiliku.
Ég ætla að rækta fullt af sléttblaða steinselju sem auðvelt er að frysta.  Einnig fullt af dilli sem ég fékk mikið dálæti á síðastliðið sumar.  Rauðrófurnar verða á sínum stað en ég veit ekki hvort ég muni sá fyrir gulrótum sem ekki hafa heppnast svo vel hjá mér á undanförnum árum.  Brokkolí ætla ég að rækta nóg af því það er ótrúlega gott bæði hrátt og léttsoðið með smjöri.  Kartöflur eru fastur liður en ég er mikil kartöfluæta.  Síðan er það salatið að sjálfsögðu og kannski einhver laukur.  Ég hef ræktað sykurbaunir undanfarin ár, þær eru mjög góðar en blómstra seint og hafa eyðilagst í frostum að hausti.  Kannski ætti ég að reyna að forrækta þær í ár.
Ég ætla að reyna að verða mér útum Lavenderfræ í ár, mig langar í fullt fullt af Lavender í garðinn hjá mér.

Ég fór í gegnum fræsafnið hjá mér, alltaf nóg til

sáði fyrir basiliku

Sáði beint í pottinn, gott er að setja venjulega mold og svo smá sáðmold efst .  Bleyta vel í.    Svo breiði ég dagblöð yfir pottinn á meðan spírun stendur.  

Desembergarðurinn

Snjór er nú yfir öllu.  Mér finnst garðurinn mjög fallegur í vetrarbúningi.  Enn eru nokkur ber á runnum og blómin standa visin í pottunum eins og skúlptúrar.
Ég á enn kartöflur í geymslunni og Chili á plöntunum inni.  Í frystinum er timian og steinselja.  Grænkálið er úti í beði og bíður eftir að vera borðað.

Síðasta sumar var ágætt í garðinum.  Nokkuð þurrt þó sem var slæmt. Ég sáði fyrir lang flestu í ár, keypti ekkert forræktað.   Kartöfluuppskeran var ekki nógu góð fannst mér.  Ég fékk mikið af baunum en gat ekki notið þeirra allra þar sem þær þroskuðust ekki fyrr en í september og þá var ég í útlöndum
Brokkólíið bar ekki knúppa og var því alveg misheppnað í ár.  Nóg var af steinselju og timian.  Einnig ágæt uppskera af rauðrófum en gulræturnar heppnuðust ekkert sérlega vel hjá mér í ár frekar en áður.  Það er í þeim óværa, gulrótarfluga sem étur þær.
Dillið var mikið notað og mig langar í meira af því á næsta ári.  Sérlega ljúffengt krydd.
Ég var ánægð með Lavenderið mitt og er það allt þurrkað og komið inní skápa þar sem það eyðir skápalykt.    
Ég sáði fyrir kamillu sem ekki spíraði.
Kúmenið gaf fullt af sér en svolítið maus er að hreinsa fræin.  Paprikurnar voru hálf misheppnaðar, urðu pínulítil grey og hálf bragðlaus, Gúrkan gaf vel af sér og einnig Zucchini plönturnar en þær eru eiginlega of stórar til að vera inni í pottum.
Ég fékk 2 súrkirsiber, fullt af hindberjum og jarðaberjum.
Tómatarnir eru fyrirferðamiklir inni í stofu og ég held ég sleppi þeim á næsta ári.
Ég fékk heljarmikla uppskeru af Basiliku og ætla að sá fyrir henni á næsta ári líka
Svartræturnar mínar eru enn í moldinni.  Ætli ég sjái ekki hvort þær lifi veturinn af.
Hér koma fáeinar myndir sem ég tók úti í garði í dag.

Góð spretta

Eftir rigninguna síðustu daga hefur gróðurinn aldeilis tekið við sér.  Garðarshólmi er í miklum blóma og uppskeran er sérdeilis góð.

Hér sést uppskeran í dag.  Þarna eru rauðrófur, gulrætur, kartöflur, hvítlaukur, salat , fennel og krydd.
Gulræturnar eru aðeins étnar líklega af gulrótarflugunni en það er samt hægt að nota þær.  Þarna sjást bæði rauðar kartöflur og premium. Hvítlaukurinn er fremur smár og lítið búinn að skipta sér.  

Loksins eru sólblómin útsprungin.  

Þarna sést yfir Garðarshólma.  Baunir eru í forgrunni

Dill og nóg af því.  

Fennelið er glæsilegt grænmeti 

Baunirnar eru farnar að þroskast.

Hér sést kúrbítur sem er staðsettur í bílskúrnum mínum.

Hindberjarunnin gefur vel af sér í ár

Eplatré

Baunir í garðinum mínum, ég hef þær í stóru keri og það kemur vel út.

Við erum á fullu að tína jarðaber, sólber og hindber.  Það kom ágætlega út að sá salati með 1-2 vikna millibili.  Við eigum enn alveg fullt af salati.

Rigningartíð

Nú rignir í fyrsta sinn að einhverju ráði í sumar.  Ég hef ekkert þurft að vökva í nokkra daga.  Það hefur ekki gerst frá því að ég sáði í vor.  Þá gefst tími til að gera aðra hluti sem er ágætt.
Nú er jarðaberjatíminn í algleymi og við tínum á hverjum degi.  Einnig eru hindberin farin að roðna, ég sé fram á að fá nokkur stykki í ár.  Í fyrra fékk ég eitt.  Sólberin eru líka tilbúin og við tínum þau upp í okkur jafnóðum.
Salatið er orðið hálf úr sér vaxið og mikið af sniglum í því.  Þarf að muna að sá oftar næsta sumar.
Gulræturnar eru ormétnar, það er líklega gulrótarfluga sem á þær herjar.  Mér var sagt að það þyrfti að vera smá gola á vaxtarstaðnum en gulrótarbeðið mitt er í miklu skjóli.
Kartöfluuppskeran er lítil í ár.  Bara 2-3 kartöflur undir hverju grasi, ekki mikill jarðvegur í kartöflubeðinu.  Ég setti þó ríflega af hrossaskít sem varð þess valdandi að beðið hefur verið þakið arfa í allt sumar.  Það hjálpar ekki sprettunni.  Kartöflurnar sem koma eru þó fallegar og bragðgóðar.
Ég er búin að taka upp einn hvítlauk sem var lítill og hafði ekki skipt sér en mjög góður.  Þarf líklega að taka þá alla upp þar sem grösin eru alveg gulnuð. Ég þarf samt að biða eftir þurrki.
Rauðrófurnar eru fínar enn sem komið er.
Dillið er tilbúið og er ljúffengt með kartöflunum og rauðrófunum.  Ég ætla að rækta meira af því á næsta ári.

ber og salat úr garðinum á Kambsvegi

Heimferð úr Garðarshólma

Gulrætur 

rauðrófur

Aspas sprotar

Brokkolí, ætlar ekki að gefa mér neina hausa bara stór blöð

Gulrótargrös

laukur

Kartöflugrösin eru hálf gul og smá

Premium kartöflur

Fennel er alveg að verða klárt

rauðrófugrösin