Rigningardagur

Ég ætlaði að nota daginn í dag til að stinga upp garðana mína í Smálöndum en nú rignir svo mikið að ég er hætt við.
Ég ætla að vera með tvenns konar kartöflur í ár, Premium og Rauðar.  Þær eru komnar útí bílskúr til spírunar.  Chili og papríkufræin eru ekkert farin að spíra.

Kúrbíturinn er strax búinn að skjóta upp kollinum

eins tómatarnir

Brum á eplatré

Brokkoli

laukarnir, þarf líklega að fara að gefa þeim áburð

Rósmarínið vex hægt 

Kartöfluútsæðið Premium til spírunar

Fyrsti vinnudagur í Smálöndunum

Það var gott veður um helgina og við notuðum tækifærið og fórum uppí Smálönd og byrjuðum undirbúningsvinnuna fyrir sumarið.  Reyta arfa og stinga upp beðin.

Ég er líka búin að vera að sá á fullu og ég á svo mikið af fræjum að ætla mætti að ég væri með heilan búgarð og fullt af gróðurhúsum en ekki nokkurra fermetra skika til ræktunar.

Klippti eplatrén sem var nú ekki stór aðgerð þar sem þau eru bara litlar píslir enn, samt er mikilvægt að gera það rétt frá byrjun og ég er að lesa mér til um réttar aðferðir.

Ég sáði líka fyrir salati, radísum og vorlauk í beð með plasti yfir.

Eplatré, búið að klippa af toppnum

Áður en klippt var af toppnum

og eftir, klippa skal nálægt brumi á ská.  

heimasætan að hjálpa foreldrunum í Smálöndunum

Hér glittir í hvítlaukana mína til hægri á myndinni. 

Í þetta beð sáði ég salati, radísum og vorlauk

Vetur konungur

Ég verð að segja að það er komin smá fiðringur í mig.  Er allavega farin að skipuleggja sumarið í huganum.  Er farin að velta fyrir mér tegundum sem mig langar til þess að prufa í sumar.  Ég kíki venjulega inná síðu á fésbókinni sem heitir Ræktaðu garðinn þinn og sé að sumir eru farnir að sá fyrir sumarblómunum.  Ég ætla að byrja forræktunina í lok febrúar, byrjun mars.  Það er að minnsta kosti stefnan núna.

Fór út í garð nýlega og þá blasti við mér eyðileggingin.  1 af þremur eplatrám mölbrotið.  Festing á stuðningsvír hafði gefið sig vegna snjóþyngsla. 

mölbrotið eplatré er sorgleg sjón

Heldur leiðinlegt, gæti nú samt alveg bjargast en það kemur að sjálfsögðu betur í ljós í vor.  Ég veit ekki hvaða yrki þetta er, merkimiðinn er á kafi í snjó.

Grænkálið er gaddfreðið en gæti alveg lifnað við ef kári sleppir tökunum einhverntímann.

grænkál í vetrarbúningi

Garðurinn er búinn að vera á kafi í snjó í langan tíma 

nokkur strá í snjónum

Ég hef lengi ætlað að punkta hjá mér hvernig ræktunin gekk síðasta sumar og hvað mig langar að gera næsta sumar.  

Kartöflurnar verða líklega alltaf efstar á lista:  Í ár ræktaði ég 5 tegundir, rauðar, gullauga, bláar, möndlu og premier.  Mér fannst uppskeran ekkert til að hrópa húrra fyrir, arfinn var allt að drepa, það var vottur af kláða í þeim og sprettan misjöfn.  Ég er á síðustu kílóunum núna.

stæstu möndlurnar 

möndlurnar eru mjög góðar 

bláar eru svolítið skemmtilegar útlits en bragðið ekkert sérstakt

Hugsa að ég einbeiti mér að rauðum í sumar, þær eru bestar, reyndar eru möndlurnar mjög góðar líka og komu mjög vel út brúnaðar með jólasteikinni.

Ég ætla að halda áfram að rækta tómata, fannst það svolítið skemmtilegt.

Steinselja er fastagestur á listanum hjá mér.  Hún er alltaf góð, vex vel, svo er hægt að frysta hana, á hana enn til í frystinum.  Ætla að rækta enn meira af henni næsta sumar, vefja henni upp í plastpoka og frysta eins og sýnt er hér:http://awaytogarden.com/growing-and-storing-a-year-of-parsley.
Ég á líka grænkál í frystinum.

Timian er eitt af mínum uppáhaldskryddum en mér hefur ekki gengið vel að rækta það.  Alltaf verið hálf ræfilslegt hjá mér.  Ætla að reyna að vanda mig sérstaklega vel næsta sumar.

Baunirnar voru mjög góðar og uxu vel en í ár ætla ég að forrækta þær því annars eru þær of seinar á sér og eyðileggjast í haustfrostunum áður en þær eru hættar að gefa af sér.

Svartræturnar voru góðar, Spergilkál og hnúðkál sælgæti vaxa vel, hef keypt þetta forræktað.  Reyni kannski að forrækta í ár ef ég kem mér upp góðri aðstöðu með ljósi eins og ég er með á planinu.

Allskyns Blaðsalat er nauðsynlegt.  Var með lítið beð úti í heimilisgarðinum.  Virkilega gott.  Graslaukar og Vorlaukar eru einfaldir og góðir

Sáði líka fyrir matlauk, hann var lítill og fallegur en því miður komust í hann þjófar.  Ætla að reyna þetta aftur á næsta ári.

Í ár ætla ég að rækta Sellerí en það er nýjasta æðið hjá mér.  Ætla líka að reyna við Aspas ef ég næ í fræ.
Agúrka  og Zucchini eru líka á lista.  Ætli stofan hjá mér verði ekki undirlögð af plöntum.

Rauðrófurnar eru ómissandi.  Mér fannst koma betur út að sá þeim beint frekar en að planta forræktuðum.  Þær hlupu í njóla hjá mér.  Mun sá fyrir enn fleirum í ár.

Listinn er alls  ekki tæmdur, en segi þetta gott í kvöld

vetrarstemning

Uppskera

23 júlí voru fyrstu kartöflurnar teknar upp.  Þær voru af gerðinni Premier.  Einnig var brokkolíið tilbúið.  Hvoru tveggja gómsætt auðvitað.
Í dag grisjaði ég gulræturnar og rauðrófurnar sem ég sáði fyrir.
Jarðaberin eru að þroskast og þegar við sáum að rauðu berin voru hálf étin var breitt yfir beðið en það sást til sökudólgsins hoppa í kring.  Lítill spörfugl.
Rauðrófusalat sumarsins er svona:
Nokkrar litlar rauðrófur, jafn mikið af gulrótum.  Einnig hnúðkál radísur eða zucchini ásamt einu epli.  Allt rifið í skál og sítróna kreist yfir.  Þá er ca 2 skallottulaukar skornir fínt og settir í.  Að lokum er majonesi og sýrðum rjóma eða skyri hrært saman við um eina tsk dijon sinnepi og dressingin sett á salatið.
Svartyllirinn er útsprunginn og eru greinarnar svo þungar af blómaklösunum að þær leggjast að jörðu.  Búið er að gera saft úr 30 blómum en nóg er eftir.

sykurbaunirnar eru byrjaðar að klifra eftir vírunum 

sykurbaunir

svartræturnar vaxa hægt

laukur

fennel

rauðrófurnar grisjaðar

blómaklasi af svartyllinum.  Tilbúinn til að hægt sé að gera saft úr honum

Svartyllirinn þakinn blómum

brokkolí

fyrstu kartöflur sumarsins

Vandamál í ræktun

Nú stendur forræktun yfir og gluggakistur fullar af litlum græðlingum.  Það er ekki besti staðurinn fyrir þá þar sem oft verður of heitt og kannski ekki alveg nóg birta.  En maður notar það sem maður hefur og ég bý ekki svo vel enn sem komið er að eiga gróðurhús, það er þó draumurinn.   Kryddin þrífast ágætlega, en brokkolíið  þrífst ekki sem best, blöðin eru gul og það vex illa. Er búin að vökva með Maxicrop áburði.

ósköp vesöl þessi

Ég spurði snillingana í Garðyrkjufélaginu en á síðunni þeirra er hægt að senda inn  spurningar og yfirleitt fær maður mjög greinargóð svör.  Það stóð ekki á svörum í þetta sinn frekar en endra nær.  Hafsteinn áleit að plönturnar skorti að öllum líkindum nitur og ég gæti notað annað hvort tilbúin NPK áburð eða hænsnaskít blönduðum í vatni.  Þá er blandan 1 msk í 1 lítra af vatni og leyfa blöndunni að liggja eina nótt áður en vökvað er með henni.  Þar sem ég reyni eins og ég get að vera lífræn í minni ræktun þá ætla ég að prufa þetta.  Takk Hafsteinn.