Vetur konungur

Ég verð að segja að það er komin smá fiðringur í mig.  Er allavega farin að skipuleggja sumarið í huganum.  Er farin að velta fyrir mér tegundum sem mig langar til þess að prufa í sumar.  Ég kíki venjulega inná síðu á fésbókinni sem heitir Ræktaðu garðinn þinn og sé að sumir eru farnir að sá fyrir sumarblómunum.  Ég ætla að byrja forræktunina í lok febrúar, byrjun mars.  Það er að minnsta kosti stefnan núna.

Fór út í garð nýlega og þá blasti við mér eyðileggingin.  1 af þremur eplatrám mölbrotið.  Festing á stuðningsvír hafði gefið sig vegna snjóþyngsla. 

mölbrotið eplatré er sorgleg sjón

Heldur leiðinlegt, gæti nú samt alveg bjargast en það kemur að sjálfsögðu betur í ljós í vor.  Ég veit ekki hvaða yrki þetta er, merkimiðinn er á kafi í snjó.

Grænkálið er gaddfreðið en gæti alveg lifnað við ef kári sleppir tökunum einhverntímann.

grænkál í vetrarbúningi

Garðurinn er búinn að vera á kafi í snjó í langan tíma 

nokkur strá í snjónum

Ég hef lengi ætlað að punkta hjá mér hvernig ræktunin gekk síðasta sumar og hvað mig langar að gera næsta sumar.  

Kartöflurnar verða líklega alltaf efstar á lista:  Í ár ræktaði ég 5 tegundir, rauðar, gullauga, bláar, möndlu og premier.  Mér fannst uppskeran ekkert til að hrópa húrra fyrir, arfinn var allt að drepa, það var vottur af kláða í þeim og sprettan misjöfn.  Ég er á síðustu kílóunum núna.

stæstu möndlurnar 

möndlurnar eru mjög góðar 

bláar eru svolítið skemmtilegar útlits en bragðið ekkert sérstakt

Hugsa að ég einbeiti mér að rauðum í sumar, þær eru bestar, reyndar eru möndlurnar mjög góðar líka og komu mjög vel út brúnaðar með jólasteikinni.

Ég ætla að halda áfram að rækta tómata, fannst það svolítið skemmtilegt.

Steinselja er fastagestur á listanum hjá mér.  Hún er alltaf góð, vex vel, svo er hægt að frysta hana, á hana enn til í frystinum.  Ætla að rækta enn meira af henni næsta sumar, vefja henni upp í plastpoka og frysta eins og sýnt er hér:http://awaytogarden.com/growing-and-storing-a-year-of-parsley.
Ég á líka grænkál í frystinum.

Timian er eitt af mínum uppáhaldskryddum en mér hefur ekki gengið vel að rækta það.  Alltaf verið hálf ræfilslegt hjá mér.  Ætla að reyna að vanda mig sérstaklega vel næsta sumar.

Baunirnar voru mjög góðar og uxu vel en í ár ætla ég að forrækta þær því annars eru þær of seinar á sér og eyðileggjast í haustfrostunum áður en þær eru hættar að gefa af sér.

Svartræturnar voru góðar, Spergilkál og hnúðkál sælgæti vaxa vel, hef keypt þetta forræktað.  Reyni kannski að forrækta í ár ef ég kem mér upp góðri aðstöðu með ljósi eins og ég er með á planinu.

Allskyns Blaðsalat er nauðsynlegt.  Var með lítið beð úti í heimilisgarðinum.  Virkilega gott.  Graslaukar og Vorlaukar eru einfaldir og góðir

Sáði líka fyrir matlauk, hann var lítill og fallegur en því miður komust í hann þjófar.  Ætla að reyna þetta aftur á næsta ári.

Í ár ætla ég að rækta Sellerí en það er nýjasta æðið hjá mér.  Ætla líka að reyna við Aspas ef ég næ í fræ.
Agúrka  og Zucchini eru líka á lista.  Ætli stofan hjá mér verði ekki undirlögð af plöntum.

Rauðrófurnar eru ómissandi.  Mér fannst koma betur út að sá þeim beint frekar en að planta forræktuðum.  Þær hlupu í njóla hjá mér.  Mun sá fyrir enn fleirum í ár.

Listinn er alls  ekki tæmdur, en segi þetta gott í kvöld

vetrarstemning

Jólagjafir garðyrkjumannsins

Þá er aðventan gengin í garð, garðurinn er undir snjóþekju.
Ég hef verið að velta fyrir mér hvað garðyrkjumaðurinn í mér myndi vilja í jólagjöf og hér eru nokkrar hugmyndir:

Greinatætari: Þá væri hægt að nýta greinarnar í safnhauginn sem er erfitt ef þær eru heilar.
Safnhaugatunna:  Er með opinn safnhaug en langar til að prufa lokaðan líka.  Mjög mikill munur þegar hægt er að setja heimilisúrganginn á safnhauginn.  Minnkar rusl heilmikið

Góða greinasög:  Alltaf að saga einhverjar greinar og á ekki góða sög.

Smart stígvél  td þessi:


gúmmískór:


Aerogarden svo ég geti ræktað salat á veturna:




mig langar í þessa bók:




og þessa:




og þessa: Góður matur gott líf: í takt við árstíðirnar

og svo örugglega margt fleira sem ég man ekki í bili.

Gleðileg jól!

Lavender

Ég er búin að þurrka lavenderinn minn og setja hann í litla poka.  Þá set ég í fataskúffurnar til að gefa góða lykt.  Ég hef lengi haft lavender í skúffunum mínum en hann heldur fatnaði og rúmfötum ferskum.  Þetta er þó fyrsta árið sem ég er sjálfbær á þessu sviði.  Hef alltaf þurft að kaupa hann.  Ég sáði fyrir lavender í vor og hann blómstraði heldur seint.  Ætli ég þurfi ekki að setja hann inn í bílskúr í vetur.  Veit samt ekki hvort ég nenni að standa í því.  Mér hefur ekki enn tekist á láta lavender lifa af veturinn en hef heyrt að sumum hafi tekist það.

Hér er hann í blóma

og kominn í poka, ilmar vel....

Garðurinn minn í nóvember

Hvað er hægt að gera í matjurtagarði í nóvember?  Ég fór út í garð í vikunni og týndi sléttblaða steinselju.  Einnig er töluvert af grænkáli útum allan garð en það fékk leyfi til þess að sá sér.
Mér sýnist Svartyllirinn minn hafa þroskað ber og er enn að mynda blómknúppa. Ég hef samt ekki týnt berin, klasarnir eru ekki mjög margir.

Ber á Svartylli

Blómaklasi á sama runna

Svartyllirinn minn er hálf druslulegur greyið.  Þyrfti smá snyrtingu

Gulræturnar mínar voru hálf misheppnaðar í ár.  Þær síðustu sem ég tók upp um miðjan október voru morknar og ég held að það hafi jafnvel verið í einhverjum þeirra ormar.  

morkin gulrót.  

 Ég setti niður hvítlauk í Garðarshólma síðustu helgina í október.

Þetta er tegundin af hvítlauk sem ég setti niður.  Setti rif úr 3 laukum.

Hér kemur svo mynd af bláu kartöflunum mínum.  Þær eru svolítið flottar en mér finnst rauðar samt alltaf bestar.  Kartöfluuppskeran var mun minni í ár en í fyrr.

Bláar kartöflur

Enn eru að þroskast tómatar í stofunni minni.  Þeir eru svolítið vatnskenndir en það eru líka tómatarnir sem ég kaupi útí búð.

Hvað er svo framundan?  Enn get ég tekið upp grænkál, svo er eftir að gera upp árið.  Fara yfir það sem vel gekk og ekki eins vel.  Svo er bara að fara að skipuleggja sáningu á nýju ári.  Ég ætla að setja upp flúorljós fyrir græðlingana mína.

Svartrætur og Grænkálssnakk

Ég tók upp restina af Svartrótunum í gær í skítakulda og hálfgerðu myrkri.  Í dag sauð ég þær svo og borðaði með steikta fiskinum.  Fyrst er að skræla þær og á meðan þær bíða eftir að komast í pottinn þarf að setja þær í sítrónuvatn því þær gulna fljótt.  Þær eru fallega hvítar á litinn.  Svo sauð ég þær í 10 mínútur í vatni og smjöri.  Setti smá salt á þær.  Þær voru ljúffengar.
Það er dálítið maus að taka þær upp því þær vilja brotna.

Ég tók upp slatta af grænkáli í lok september og var að flýta mér svo mikið að allt fór beint í frystinn án nokkurs undirbúnings.  Í kvöld gerði ég svo grænkálssnakk en uppskriftin kemur frá Þórgunni vinkonu í gegnum krókaleiðir.

Maður blandar saman
1 msk tahini
1 msk tamarisósu
1 msk sítrónusósu
1 hvítlauksrifi
Tekur grænkálið og veltir uppúr þessu og þurrkar svo í ofni við ca 80-100gráður í um klst. Mér finnst þetta ljúffengt og mun gera þetta aftur.

Svo bæti ég við mynd af laumufarþegunum frá Osló.

Týndi eikarakörn á Karl Johan og þetta villiepli  ekki langt frá.  Ætla að sá þessu við fyrsta tækifæri.  

Eplatrjám plantað

Setti Eplatrén niður fyrsta október.  Fékk hjálp við að setja niður staura og festa víra á þá.  Gróf 50-60 cm djúpar holur sem voru 60 cm á breidd.  Setti smá hænsnaskít í botninn og blandaði vel.  

3 í röð og eru bundin á víra.  Munu verða vanin í svokallað Espalier form.  Nú er ég bara að spá í hvort ég eigi að klippa toppinn af í haust eða næsta vor.  Er ekki viss.
Súrkirsiberjatréð er enn í sínum potti sem ég gróf niður í beð fyrir veturinn.  Ætla að reyna að koma því fyrir við húsvegg.  Geri það væntanlega næsta vor.
Fór í dag í Smálönd og tók upp restina af gulrótunum, svartræturnar og fullt af brokkolíi og steinselju.  Baunirnar voru ónýtar því miður.  Búnar af frjósa og þola það greinilega ekki mjög vel.  Dálítið maus að grafa svartræturnar upp því þær brotna auðveldlega.  Örugglega eitthvað trix sem ég verð að kynna mér ef ég ætla að prufa þær aftur.  Líklega eru þær of hægvaxta fyrir íslenskt veðurfar, voru fremur smáar hjá mér.  Er líka enn að fá tómata.  Þeir eru orðnir minni en í sumar og ekki eins bragðmiklir finnst mér.  Ég er búin að setja fullt af grænkáli í frystinn þvi ég þurfti að taka upp allt kálið mitt og færa kálbeðið þegar ég gróðursetti eplin.
Nú er bara eftir að setja niður hvítlauk og hreinsa arfa (ef ég nenni)
Ég var í Osló um helgina og týndi þar eikarakörn á Karl Johan og einnig villiepli sem ég ætla að prufa að sá að gamni.

Nokkrar haustmyndir úr garðinum

grænkálið sprettur vel

Lavender að springa út

2 toppar að berjast um yfirráð, annar verður að víkja

Svartyllirinn enn að blómstra

Eplatrén í bakgrunni, er að undirbúa gróðursetningu

hindber

berin á svartyllinum eru ekki orðin þroskuð og ná varla þroska fyrir frost